काठमाडौँ — नेकपा माओवादी केन्द्रको स्थायी कमिटी बैठक सोमबार सम्पन्न भएको छ। बैठकले विभिन्न समसामयिक राजनीतिक विषयमा प्रस्ताव पारित गर्दै सरकारलाई तत्काल कदम चाल्न आग्रह गरेको छ।
बैठकपछि उपाध्यक्ष एवं प्रवक्ता अग्नि सापकोटाले तराई–मधेस क्षेत्रमा खडेरीको चपेटामा परेका किसानलाई राहत दिनुका साथै दीर्घकालीन समाधान खोज्न सरकारसँग माग गरिएको जानकारी दिए। बैठकले कालोबजारी नियन्त्रण गर्न, विद्यालय शिक्षा विधेयक पारित गर्न र ढिलाइप्रति आपत्ति जनाउँदै सहमति अनुसार अघि बढाउन आग्रह गरेको छ।
माओवादीले प्रहरीसम्बन्धी विधेयक अघि बढाउन, सहकारी पीडितको रकम फिर्ता गराउन र भोटेकोशी प्रभावित लगायत भूकम्पपीडितलाई तत्काल राहत दिन सरकारको ध्यानाकर्षण गराएको छ। मध्यपूर्वमा रहेका नेपालीको सुरक्षाका साथै विपीन जोशीको रिहाइको माग पनि बैठकले उठाएको छ।
त्यसैगरी, जाजरकोट–रुकुम भूकम्पपछिको पुनर्निर्माण, मलखाद अभाव नहोस् भन्ने सुनिश्चितता, सीमासम्बन्धी समस्या समाधानका लागि कूटनीतिक पहल, भूमिसम्बन्धी विधेयक संसदमा पेश गर्ने, उखु किसानको बक्यौता र दूध किसानको समस्या समाधान गर्ने विषयमा समेत माओवादीले जोड दिएको छ।
भ्रष्टाचार नियन्त्रणका लागि अधिकार सम्पन्न आयोग गठन गर्नुपर्ने र भ्रष्टाचारमा मुछिएका मन्त्रीहरूमाथि निष्पक्ष छानबिन हुनुपर्ने माग बैठकले गरेको छ।
माओवादीले त्रिभुवन विश्वविद्यालयलगायत शैक्षिक संस्थाहरूमा दलगत हस्तक्षेपको विरोध गर्दै संवैधानिक निकायमा भएको हस्तक्षेपप्रति पनि गम्भीर आपत्ति जनाएको छ। स्टार्टअप कार्यक्रमको बजेट कटौतीप्रति असन्तुष्टि जनाउँदै, वैज्ञानिक प्रणालीमार्फत नवप्रवर्तन योजनामा लगानी वृद्धि गर्न आग्रह गरिएको छ।
बैठकले आगामी दसैँपछि र तिहारअघि केन्द्रीय समिति बैठक बोलाउने निर्णयसमेत गरेको छ।
