काठमाडौँ — बागमती प्रदेशका मुख्यमन्त्री बहादुरसिंह लामाले पदबाट राजीनामा दिएका छन्। ९ साउन २०८१ मा पदभार सम्हालेका लामा एक वर्ष ९ दिनपछि आइतबार साँझ पदबाट बाहिरिए।

लामा नेपाली कांग्रेसका तर्फबाट बागमतीको नेतृत्व गर्ने तामाङ समुदायका पहिलो मुख्यमन्त्री हुन्। उनले पार्टी सभापति शेरबहादुर देउवाको निर्देशनमा राजीनामा दिएको जानकारी दिएका छन्।

साँझ ६ बजे प्रदेश सरकारको सुशासन हलमा आयोजित पत्रकार सम्मेलनमा लामाले आफ्नो कार्यकालको समीक्षा गर्दै आफूले इमान्दारीपूर्वक सेवा गरेको दाबी गरे। तर, उनले पार्टीभित्रैको "प्रपञ्च" का कारण राजीनामा दिनुपरेको आरोप पनि लगाए।

“दलभित्रैका खेलले सरकार छोड्नुपर्‍यो,” लामा भावुक शैलीमा बोले, “तर म भाग्ने होइन, यो घटनाक्रमबाट लोकतन्त्र र गणतन्त्र नै जोखिममा परेको देखिन्छ।”

उनको राजीनामाले बागमती प्रदेशको सत्ता समीकरण फेरि तरल अवस्थामा पुगेको छ। कांग्रेस नेतृत्वमै नयाँ नाम अघि बढ्ने सम्भावना रहेको भए पनि दलभित्रको खिचातानीले प्रक्रिया जटिल बन्ने आँकलन गरिएको छ।