काठमाडौं । नेकपा एमालेका अध्यक्ष केपी शर्मा ओलीले पूर्वराष्ट्रपति विद्यादेवी भण्डारीको नाममा राजनीति नगर्न पार्टी नेताहरूलाई सचेत गराएका छन्। पार्टीको नवौं केन्द्रीय कमिटी बैठकमा बोल्दै उनले भण्डारीले के गर्ने भन्ने अझै स्पष्ट नगरेकाले नेताहरू उनका प्रवक्ता नबन्न आग्रह गरे।
ओलीले केही नेताहरू भण्डारीको अघिपछि हिंडेकोप्रति असन्तुष्टि जनाउँदै, चुनाव हारेका नेताहरू पनि अनावश्यक रूपमा पछ्याएको बताए। उनले भण्डारीलाई आफैंले बालुवाटार बोलाएको स्वीकार गरे पनि च्यासलमा भेट हुनुपर्ने परिस्थिति आएको खुलाए।
बैठकमा उनले एमालेलाई सधैं हमला सहनु परेको उल्लेख गर्दै, अफवाह, झुट र स्तरहीन आक्रमणसँग पार्टी जुधिरहेको बताए। उनले पार्टीभित्र अस्वस्थ गतिविधि सह्य नहुने पनि स्पष्ट पारे।
गालीगलौजको प्रवृत्तिमा मोहनविक्रम सिंह र पुष्पकमल दाहाल (प्रचण्ड) को भूमिकाबारे पनि टिप्पणी गर्दै ओलीले प्रचण्डलाई “राष्ट्रिय राजनीतिमा धोका” को प्रतीक भने।
पार्टीको ‘मिसन ०८४’ लाई सफल पार्न सबै नेता र कार्यकर्तालाई एकजुट हुन आह्वान गर्दै, ओलीले बहुमत ल्याउने लक्ष्यमा केन्द्रित रहन आग्रह गरे। साथै, उनले ७० वर्षे उमेरहदको प्रस्ताव आफैंले ल्याए पनि वर्तमान परिस्थितिमा त्यसलाई हटाउनु परेको बताए।
