काठमाडौँ । पूर्व राष्ट्रपति विद्यादेवी भण्डारी आइतबार एमाले अध्यक्ष तथा प्रधानमन्त्री केपी शर्मा ओलीसँग भेट गर्न च्यासलस्थित पार्टी कार्यालय पुग्नुभएको छ। भेटका क्रममा समसामयिक राजनीतिक विषय र पार्टीभित्रको आन्तरिक बहसबारे छलफल हुने जानकारी एमाले प्रचार विभाग प्रमुख राजेन्द्र गौतमले दिनुभएको छ।
शनिबार बसेको पोलिटब्युरो बैठकले पार्टीको विधान मस्यौदालाई संशोधनसहित अनुमोदन गरेपछि पूर्व राष्ट्रपति भण्डारीको सक्रिय राजनीतिमा पुनः प्रवेश र सदस्यता नवीकरणको चर्चा बढेको हो। यही विषयमा थप स्पष्टता ल्याउन उहाँले ओलीसँग भेटको समय मिलाउनुभएको बताइएको छ।
पार्टी उपाध्यक्ष विष्णुप्रसाद पौडेलले प्रस्तुत गर्नुभएको विधान मस्यौदामा उमेर सीमा ७० वर्ष र दुई कार्यकालको सर्त हटाउने प्रस्ताव पनि स्वीकृत भइसकेको छ। अबको केन्द्रीय कार्य समिति बैठकमा यी विषयमाथि विस्तृत छलफल हुने नेताहरूले बताएका छन्।
पूर्व राष्ट्रपति भण्डारीका प्रमुख स्वकीय सचिव राजकुमार राईले भेटमा पार्टीभित्रको बहस र समसामयिक राजनीति दुबै विषयमा छलफल हुने जानकारी दिनुभयो।
