काठमाडौं । बलात्कार आरोपित झापाको विर्तामोड नगरपालिकाका पूर्वप्रमुख ध्रुवकुमार शिवाकोटीलाई उच्च अदालत विराटनगरले धरौटीमा छाड्न आदेश दिएको छ ।
इलाम इजलासमा न्यायाधीश किरणकुमार पोखरेल र रेखा पाण्डे थापाको संयुक्त इजलासले हिजो २० लाख धरौटीमा शिवाकोटीलाई रिहा गर्ने आदेश दिएको हो । अदालतको आदेशसँगै शिवाकोटी पर्सी आइतबार थुनामुक्त हुने बताइएको छ । यो आदेशपछि न्याय पाउने आशामा बसेका पीडित पक्ष भने निरास बनेका छन् ।
बलात्कारजस्तो गम्भीर मुद्दामा अभियुक्तलाई अस्पतालमै बस्न दिनु र अन्तिममा धरौटीमा छाड्ने अदालतको फैसलाले आफुहरुलाई थप पिडा दिएको पीडित पक्षको गुनासो छ । घरेलु कामका लागि आफ्नै घरमा राखेकी १५ वर्षीया बालिकालाई पटक–पटक बलात्कार गरेको आरोपमा शिवाकोटी गत मंसिर २४ गते पक्राउ परेका थिए ।
पक्राउ परेका दिनदेखि नै शिवाकोटीले अस्पतालको क्याबिनमा बस्ने सुविधा पाएका थिए । अनुसन्धानका क्रममा उनलाई एक दिनपनि प्रहरी कार्यालय नलगिएको भन्दै स्थानीयले राजनीतिक शक्तिको दुरुपयोग भएको आरोप लगाउदै आएका छन् । अस्पताल पुगेरै प्रहरीले शिवाकोटीको बयान लिएको थियो ।
गत पुस २२ मा जिल्ला अदालत झापाले पुर्पक्षका लागि थुनामा राख्न आदेश दिएपनि उनी शक्तिको आडमा अस्पतालमै बसेर रिहा हुन लागेका हुन् । पक्राउ परेको दिनदेखि झण्डै पाँच महिना शिवाकोटी बीएण्डसी अस्पतालको भीआईपी क्याविनमा बस्दै आएका छन् ।
