काठमाडौं — भदौ १० गते रसुवामा आएको बाढीबाट प्रभावित परिवारका लागि  **अमृत क्याम्पस (ASCOL) स्वतन्त्र विद्यार्थी युनियन (स्ववियु)**ले राहत सामग्री संकलन गरेको छ। बाढीपीडितको सहयोगका लागि विद्यार्थी, प्राध्यापक तथा सहयोगी मनहरूको सहभागितामा खाद्यान्न, लत्ताकपडा, औषधि लगायतका अत्यावश्यक सामग्री संकलन गरिएको स्ववियुले जनाएको छ।

संकलित सामग्री व्यवस्थित गरी छिट्टै रसुवाका प्रभावित क्षेत्रमा पुर्‍याउने तयारी भइरहेको छ। स्ववियु सभापति रुद्रहरि पोखरेलले विपद्को समयमा पीडित नागरिकको साथमा उभिनु विद्यार्थीको सामाजिक दायित्व भएको बताउँदै संकलित राहत सामग्री छिट्टै रसुवा पठाइने जानकारी दिए। उनले विद्यार्थीको सक्रियताले सामाजिक सेवाप्रतिको जिम्मेवारीलाई थप बलियो बनाएको बताए।