काठमाडौं । देशका केही स्थानमा आज पनि वर्षाको सम्भावना रहेको छ भने तराईका केही क्षेत्रमा अत्यधिक गर्मी बढ्ने भएको छ ।

जल तथा मौसम पूर्वानुमान महाशाखाका अनुसार पश्चिमी तथा स्थानीय वायुको प्रभावका कारण देशका विभिन्न स्थानमा मौसम आंशिकदेखि सामान्य बदली रहनेछ ।

दिउँसो कोसी, वाग्मती र गण्डकी प्रदेशका हिमाली तथा पहाडी भूभागमा सामान्यतया बदली रहनेछ । कोसी प्रदेशका हिमाली र पहाडी क्षेत्रका केही स्थान तथा वाग्मती र गण्डकी प्रदेशका केही स्थानमा मध्यम वर्षाको सम्भावना रहेको महाशाखाले जनाएको छ ।

यस्तै, मधेस, कोसी, वाग्मती र गण्डकी प्रदेशका तराई क्षेत्रका एक–दुई स्थानमा पनि पानी पर्ने सम्भावना रहेको छ ।

महाशाखाका अनुसार सुदूरपश्चिम र लुम्बिनी प्रदेशका तराई क्षेत्रमा भने आज अत्यधिक गर्मी हुने अनुमान गरिएको छ ।