संयुक्त अरब इमिरेट्स (यूएई)को दुबईमा ड्रोन आक्रमण भएपछि दुबई अन्तर्राष्ट्रिय विमानस्थल आसपास क्षेत्रमा आगलागी भएको छ। स्थानीय अधिकारीका अनुसार विमानस्थल नजिक रहेको इन्धन भण्डारण ट्याङ्कीमा आगलागी भएपछि आपत्कालीन टोलीहरू आगो नियन्त्रणमा लिन खटिएका छन्।
दुबई मिडिया अफिसले सोमबार भएको उक्त ड्रोन आक्रमणपछि इन्धन ट्याङ्कीमा आगलागी भएको जानकारी दिएको छ। घटनापछि सिभिल डिफेन्सका टोलीहरूले तत्कालै आगो निभाउने प्रयास गरिरहेका छन्। प्रारम्भिक विवरणअनुसार घटनामा कुनै मानवीय क्षति भएको छैन।
स्थानीय सञ्चारमाध्यमहरूले दुबई अन्तर्राष्ट्रिय विमानस्थल नजिक दुई वटा ड्रोन खसेको उल्लेख गरेका छन्। आक्रमणपछि सुरक्षा सतर्कता बढाइएको जनाइएको छ।
फेब्रुअरी २८ देखि सुरु भएको अमेरिका–इजरायल र इरानबीचको युद्धपछि खाडी क्षेत्रमा मिसाइल तथा ड्रोन आक्रमणको क्रम तीव्र बनेको छ। त्यसयता खाडीका अरब मुलुकहरूले दुई हजारभन्दा बढी मिसाइल र ड्रोन आक्रमणको सामना गरिसकेको बताइएको छ।
यी आक्रमणहरू अमेरिकी कूटनीतिक नियोग, सैन्य अड्डा, तेल पूर्वाधार, बन्दरगाह, विमानस्थल, होटल तथा आवासीय र कार्यालय भवनलाई लक्षित गर्दै भइरहेका छन्। सन् २०२० मा इजरायलसँग कूटनीतिक सम्बन्ध सामान्यीकरण गरेको यूएईमा यस्ता आक्रमणको प्रभाव उल्लेखनीय देखिएको छ।
खाडी क्षेत्रका अन्य अरब मुलुकहरू पनि यस घटनाबाट प्रभावित भएका छन् र उनीहरूले इरानको आलोचना गरेका छन्।
