नेकपा एमालेका अध्यक्ष केपी शर्मा ओलीले राज्यको ठूलो धनराशी खर्च भइसकेकाले अब तोकिएकै समयमा निर्वाचन सम्पन्न हुनुपर्ने बताएका छन्। निर्वाचन स्थगनका लागि अझै पनि प्रयास भइरहेको दाबी गर्दै उनले आफ्नो पार्टी कुनै द्विविधामा नपरी चुनावी अभियानमा केन्द्रित भइसकेको स्पष्ट पारे।
उनका अनुसार निर्वाचनको तयारीका क्रममा राज्यले अर्बौं रुपैयाँ खर्च गरिसकेको छ भने उम्मेदवारहरूले समेत उल्लेख्य आर्थिक भार व्यहोरेका छन्। यस्तो अवस्थामा चुनाव सार्ने चर्चा गर्नु उपयुक्त नहुने उनले उल्लेख गरे।
ओलीले एमाले चुनाव जित्ने लक्ष्यका साथ अघि बढिसकेको भन्दै कुनै अन्योलमा नपर्न कार्यकर्तालाई निर्देशन दिए। चुनाव रोकिए पनि आफूहरू तयारीमा ढिलाइ नगर्ने उनको भनाइ थियो।
विगत छ महिनासम्म विभिन्न पहल गर्दा बेवास्ता गरिएको तर अन्तिम समयमा आएर चुनाव नहुने कुरा उठाइनु अनुचित भएको उनले टिप्पणी गरे। देशको स्रोत–साधन खर्च भइसकेपछि प्रक्रिया अवरुद्ध गर्नु उचित नहुने उनको धारणा थियो।
यसैबीच उनले राष्ट्रिय स्वतन्त्र पार्टीप्रति लक्षित गर्दै आधारविहीन रूपमा चर्किएको राजनीतिक शक्तिको संज्ञा दिएका छन्। सानो भाँडोमा चर्को आगोमा उमालेको दूधजस्तै अस्वाभाविक रूपमा उचालिएको शक्ति अहिले असन्तुष्ट गतिविधितर्फ उन्मुख भएको आरोप उनले लगाए। अन्य दलका झण्डा जलाउने, वातावरण बिगार्ने र अपमानजनक गतिविधिमा संलग्न हुने प्रवृत्ति देखिएको उनको भनाइ थियो।
