काठमाडौँ — केपी शर्मा ओली ले एक कार्यकाल पूरा गर्न आफू चार पटक प्रधानमन्त्री बन्नुपरेको बताएका छन्। नेकपा एमाले का अध्यक्षसमेत रहेका ओलीले झापा–५ मा चुनावी घरदैलो अभियानका क्रममा यस्तो टिप्पणी गरेका हुन्। सोही क्षेत्रबाट प्रतिनिधिसभा सदस्यका उम्मेदवार रहेका उनले पटक–पटक सरकार परिवर्तन हुँदा योजनाहरू निरन्तर अघि बढ्न नसकेको बताए।
उनले विकासका लागि निरन्तरता आवश्यक पर्ने उल्लेख गर्दै एउटै स्थानमा उभिएर प्रगति सम्भव नहुने धारणा राखे। “अगाडि बढ्न पाइला सार्नैपर्छ, नयाँ ठाउँमा टेक्नैपर्छ,” उनले भने। आफूले अघि सारेका रेल सेवा पुनःसञ्चालन तथा जलमार्गमार्फत समुद्रसम्म पहुँच विस्तारका योजना बीचमै अवरुद्ध गरिएको उनको गुनासो थियो।
ओलीका अनुसार सरकार गठन र विघटनको चक्रले दीर्घकालीन परियोजनाहरू प्रभावित भएका छन्। “एक कार्यकाल पूरा गर्न चार पटक प्रधानमन्त्री हुनुपर्यो,” भन्दै उनले अस्थिर राजनीतिक वातावरणले काममा बाधा पुर्याएको संकेत गरे। देशभक्ति र औद्योगिक क्षेत्र विस्तारजस्ता योजनामा आन्तरिक तथा बाह्य शक्तिबाट अवरोध आएको उनको दाबी थियो।
उनले गम्भीर नीतिगत विषय उठाउँदा त्यसलाई हल्का रूपमा व्याख्या गर्ने प्रवृत्ति देखिएको भन्दै असन्तुष्टि व्यक्त गरे। संसारका शहरहरूमा सभागृह, सामुदायिक भवन र रंगशाला हुने उल्लेख गर्दै आफूले रंगशाला निर्माणको पहल गर्दा समेत विरोध भएको बताए।
चुनावी अभियानका क्रममा उनले मतदातासँग विकासका अधुरा योजनालाई निरन्तरता दिन समर्थन मागेका छन्।
