काठमाडौ/ नेपालले इतिहासमा पहिलो पटक अन्तराष्ट्रिय स्तरको आईस स्केटिंङ प्रतियोगितामा सहभागिता जनाउने भएको छ ।
भारतीय आईस स्केटिंङ संघको आयोजना तथा एसियाली आईस स्केटिंङ महासंघ र अन्तराष्ट्रिय स्केटिंङ महासंघसंगको सहकर्यतामा हुन लागेको शर्ट ट्रयाक स्पीड आईस स्केटिंङ प्रतियोगितामा नेपालकातर्फबाट दुई जना महिला तथा चार जना पुरुष खेलाडीहरुले सहभागिता जनाउन लागेका हुन् ।
नेपाल स्केटिंङ तथा स्केटबोर्डिंङ संघका अध्यक्ष अच्युत खनालका अनुसार प्रतियोगिता आगामी पुष १२ गते देखि १४ गतेसम्म भारतको देहेरादुनस्थित माहाराना प्रताप स्पोर्ट्स कम्प्लेक्समा रहेको हिमाद्री अन्तराष्ट्रिय आईस स्केटिंङ रिंक सेन्टरमा आयोजना हुने प्रतियोगितामा नेपालबाट सिनिअर पुरुष तर्फको १००० मिटरमा रमेश मोक्तान र अरुण खत्वे त्यस्तै जुनिअर महिला तर्फको ५०० मिटरमा परी गुरागाईं र अल्का घिमिरे र पुरुष जुनिअर २५० मिटरमा जेभिअर जंग थापा र सायोन अर्यालले भाग लिने निश्चित भएको छ।
त्यस्तै सो प्रतियोगितामा टिम म्यानेजरका रुपमा सन्जु श्रेष्ठ तथा अफिशिएलमा संघका महासचिव सत्य थापाले सहभागिता जनाउने छन ।
सो प्रतियोगितामा सहभागी हुन जान लागेको नेपालि स्केटिंङ खेलाडीहरुको टिमलाई बिदाई गर्दै नेपाल ओलम्पिक कमिटीका अध्यक्ष जीवनराम श्रेष्ठले यस ऎतिहासिक सहभागिता नेपालको लागि खुसीको कुरा रहेको बताउदै शितकालीन ओलम्पिक खेलको रुपमा रहेको आईस स्केटिंङ खेल नेपालका लागि भूगोल सुहाउँदो खेल भएकोले यस खेलबाट नेपालले मेडल जित्ने बिश्वास व्यक्त गरे ।
यस्तैगरेर नेपाल स्केटिंङ तथा स्केटबोर्डिंङ संघका प्रमुख प्रशिक्षक दिलिप राज बरालले डिसेम्बर २७ देखि २९ सम्म भारतको देहरादूनमा आयोजना हुने च्याम्पियनसिपमा नेपाली खेलाडीले पदक जित्नेमा आफू विश्वस्त रहेको बताए ।
नेपाल स्केटिंङ तथा स्केटबोर्डिंङ संघ अन्तराष्ट्रिय स्केटिंङ महासंघको निवेदक राष्ट्रिय संघ रहेको छ ।
