मंगलबार सेयर बजारको मुख्य परिसूचक नेप्से ०.५३ अंक कम हुँदै २६४४.७० मा झरेको छ। दिनभर कारोबारमा उतारचढाव देखिए पनि दिउँसो १२:५१ बजे नेप्से २६५२ अंक पुग्दै दिनको उच्च बिन्दुमा पुगेको थियो।
अघिल्लो दिन ४ अंक कम भएको बजार आज पनि कमजोर रह्यो। कारोबार रकम झरेर ४ अर्ब ७१ करोडबाट ४ अर्ब ४८ करोडमा सीमित भयो। कुल १२५ कम्पनीको मूल्य बढ्दा ११९ घटे तथा १३ स्थिर रहे। सबै समूह सूचकमा उतारचढाव १ प्रतिशतभन्दा कम रह्यो।
बैंकिङ, होटल तथा पर्यटन, लगानी, जीवन बीमा र माइक्रोफाइनान्स समूहमा क्रमशः ०.५८, ०.६२, ०.०४, ०.५७ र ०.०६ प्रतिशत गिरावट देखियो। विकास बैंक ०.१७, फाइनान्स ०.२७, जलविद्युत् ०.७०, उत्पादन तथा प्रशोधन ०.५१ र निर्जीवन बीमा ०.२६ प्रतिशत उक्लिए भने अन्य समूह स्थिर रहे।
बजार समग्रमा कमजोर रहे पनि ६ कम्पनीको मूल्य १० प्रतिशतले उफ्रियो। ती मध्ये सागर डिस्टिलरी, स्वस्तिक लघुवित्त, झापा इनर्जी, माबिलुङ इनर्जी, बुङ्गल हाइड्रोपावर र श्रीनगर एग्रिटेक रहेका छन्।
यसैगरी रसुवागढी हाइड्रोपावर ८.६१, विकास हाइड्रोपावर ६.४८, दरामखोला हाइड्रोपावर ६.२७ र पिपुल्स हाइड्रोपावर ६.१८ प्रतिशत बढे। विपरीत, ग्रिन भेन्चर्स ९.८५ प्रतिशतले झर्यो भने स्टान्डर्ड चार्टर्ड बैंक ३.८८ र पोखरा फाइनान्स २.५० प्रतिशत कम भए।
सबैभन्दा धेरै कारोबार भएका कम्पनीमा युनियन हाइड्रोपावर, माउन्टेन इनर्जी, ङादी ग्रुप, ग्रिन भेन्चर्स र युनाइटेड मोदी हाइड्रोपावर परे।
