सर्वोच्च अदालतबाट आएको परमादेशले तोकेको २४ घण्टे समयसीमा सकिन लागेका बेला प्रदेश–१ का मुख्यमन्त्री सरोजकुमार यादव आज साँझ पत्रकार सम्मेलनमा उभिन लागेका छन्। उनका अनुसार पत्रकार सम्मेलन साँझ ५:३० बजे मुख्यमन्त्री निवासमै आयोजना गरिने छ।

विश्वासको मत लिन कि राजीनामा दिने भन्ने द्विविधाबीच यादवले दिनभर दलभित्रका नेता तथा कानुनविदहरूसँग परामर्श गरेका थिए। अदालतको आदेश गएराति ८ बजे नै मुख्यमन्त्री कार्यालयमा इमेलमार्फत प्राप्त भइसकेको थियो, जसअनुसार आज राति ८ बजे २४ घण्टे समयसीमा समाप्त हुँदैछ।

यदि उनले तोकिएको अवधीभित्र प्रदेश सभाबाट विश्वासको मत लिन नसके र राजीनामा पनि नदिए, उनी स्वतः पदमुक्त हुने संवैधानिक व्यवस्था लागू हुनेछ।