काठमाण्डौ — प्रहरी महानिरीक्षक (आइजीपी) दानबहादुर कार्कीले महिला तथा बालबालिकामाथि भइरहेका हिंसात्मक घटनालाई रोक्न सबै पक्ष एकजुट हुनु अनिवार्य भएको बताएका छन्। ‘प्रविधिको सही प्रयोग गरौँ : लैङ्गिक हिंसा अन्त्य गरौँ’ भन्ने मूल नारासहित नेपाल प्रहरीले आइतबारदेखि देशव्यापी १६ दिने अभियान सुरु गरेको हो।
समारोहलाई सम्बोधन गर्दै आइजीपी कार्कीले लैङ्गिक हिंसाका घटनाले व्यक्ति, परिवार र समाजमा गहिरो प्रभाव पार्ने भएकाले यसको नियन्त्रणका लागि सबै सरोकारवालाबीच बहुआयमिक समन्वय आवश्यक रहेको बताए। उनले लैङ्गिक हिंसा न्यूनीकरणका क्रममा प्राप्त सुझाव, निर्देशन र सहायताप्रति कृतज्ञता व्यक्त गर्दै अनुसन्धान, रणनीतिक योजना तथा पीडित सहयोगका कार्यक्रमलाई अझ प्रभावकारी बनाउने प्रतिबद्धता जनाए।
अभियानको अवसरमा आइजीपी कार्कीले आर्थिक वर्ष २०८१/८२ को लैङ्गिक हिंसा सम्बन्धी वार्षिक तथ्यपत्र सार्वजनिक गरे। साथै, लैङ्गिक हिंसा न्यूनीकरणमा योगदान पुर्याउने प्रहरी कर्मचारीहरूलाई प्रशंसापत्र तथा नगद पुरस्कार प्रदान गरिएको छ।
कार्कीले प्रविधिको तीव्र विकास र एआई प्रयोगका कारण हिंसाका नयाँ चुनौतीहरू देखा परिरहेको उल्लेख गर्दै नेपाल प्रहरीले शून्य सहनशीलता नीतिअन्तर्गत विभिन्न संघ–संस्था, शैक्षिक निकाय, स्थानीय तह तथा महिला सञ्जालहरूसँग सहकार्य गर्दै वर्षभरि सचेतनामूलक कार्यक्रमलाई निरन्तरता दिने जानकारी दिए।
कार्यक्रममा अपराध अनुसन्धान विभागका एआईजी सुशील सिंह राठौर, यूनिसेफ नेपालका चाइल्ड प्रोटेक्सन प्रमुख लियोन मुवोनी, महिला–बालबालिका तथा जेष्ठ नागरिक सेवा निर्देशनालयका डीआईजी दिपक कुमार बस्नेत लगायतले आफ्ना धारणा व्यक्त गरे। साथै, गृह मन्त्रालय, राष्ट्रिय महिला आयोग, सम्बन्धित मन्त्रालय तथा विभिन्न निकायका प्रतिनिधिहरूले लैङ्गिक हिंसाका चुनौती र समाधानबारे सुझाव प्रस्तुत गरे।
देशभरका प्रहरी कार्यालयका प्रमुख तथा प्रतिनिधिहरू प्रत्यक्ष र भर्चुअल रूपमा सहभागी रहेको यस कार्यक्रममार्फत लैङ्गिक हिंसा विरुद्धको साझा प्रतिबद्धता मजबुत पारिएको प्रहरीले जनाएको छ।
