उज्यालो नेपाल पार्टीले आगामी मंसिर १७ गते राजधानीस्थित प्रज्ञा भवनमा विशेष घोषणा सभा आयोजना गर्ने भएको छ। पार्टी नेता महेन्द्र लावतीका अनुसार सभामा ऊर्जा मन्त्री कुलमान घिसिङ प्रमुख अतिथिका रूपमा सहभागी हुनेछन्। लावतीले विभिन्न राजनीतिक शक्ति तथा सहकार्यका पक्षधरहरू पनि कार्यक्रममा जोडिने तयारी भइरहेको बताए।

उनका अनुसार उज्यालो नेपाल पार्टी र खगेन्द्र सुनार नेतृत्वको ‘हाम्रो पार्टी नेपाल’ बीच सहमति हुँदै आगामी प्रतिनिधिसभा निर्वाचनमा एउटै चुनाव चिह्न प्रयोग गर्ने अठोट बनिसकेको छ। अन्य दल तथा समूहसँगको सहकार्यबारे पनि छलफल जारी रहेको र सहभागीहरूको अन्तिम सूची छलफलपछि तय हुने लावतीले उल्लेख गरेका छन्।

घोषणा सभामा पार्टीको दीर्घकालीन दृष्टि, मूल उद्देश्य र विस्तृत घोषणापत्र २०८२ औपचारिक रूपमा सार्वजनिक गरिने जनाइएको छ।