नेपाली कांग्रेसमा आगामी महाधिवेशनको समयतालिकालाई लिएर बढ्दो मतभेद बीच सभापति शेरबहादुर देउवाले संस्थापनपक्षका प्रमुख नेता विमलेन्द्र निधि र कृष्णप्रसाद सिटौलालाई पनि छलफलमा समेटेका छन्। प्रतिनिधिसभा निर्वाचनअघि महाधिवेशन गर्न नहुने अडानमा रहेका दुवै नेतालाई देउवाले कार्यवाहक सभापति पूर्णबहादुर खड्का तथा महामन्त्री गगनकुमार थापा र विश्वप्रकाश शर्मासँग छलफल तय भएपछि आह्वान गरेको स्रोतले जनाएको छ।

स्रोतका अनुसार देउवाले खड्का, थापा र शर्मासँग छलफल तय गरेकै समय नेताद्वय निधि र सिटौलालाई महाराजगञ्जस्थित आफ्नो निवासमा बैठकका लागि बोलाएका हुन्। देउवाको आग्रहपछि निधि र सिटौला संस्थापन पक्षीय नेताहरूको नयाँ बानेश्वरस्थित आनन्दभूभि इभेन्ट्समा चलिरहेको भेलाबाट बाहिरिएको एक केन्द्रीय सदस्यले पुष्टि गरेका छन्।

यसअघि पनि बिहीबार निधि, सिटौला लगायत पूर्वपदाधिकारी र केही केन्द्रीय सदस्यहरू सहभागी रहको सामूहिक छलफलमा देउवाले आफ्नो नाम प्रविष्ट गरिएको विषयमा असन्तुष्टि व्यक्त गरेका थिए। त्यही दिन भएको अलग बैठकमा महामन्त्रीद्वय थापा र शर्मासँगको छलफल भने निष्कर्षविहीन बनेर टुंगिएको थियो।