सदरमुकाम बेनीलाई ग्रामीण भेगसँग जोड्ने बेनी–अर्थुङ्गे–तोरीपानी–पाखापानी सडकअन्तर्गत बेनी नगरपालिका–९ किरोखोरदेखि नेप्टेचौरसम्मको खण्डमा कालोपत्रे प्रक्रिया औपचारिक रूपमा सुरु गरिएको छ। पूर्वाधार विकास कार्यालय म्याग्दीमार्फत सञ्चालनमा रहेको बेनी–पाखापानी सडक योजनाअन्तर्गत करिब दुई किलोमिटर दूरीमा कालोपत्रे अघि बढाइएको कार्यालयले जनाएको छ।

पूर्वाधार विकास कार्यालय म्याग्दीका सवइञ्जिनियर रविन चोखालका अनुसार निर्माण व्यवसायीले सडक विस्तार, टेवा पर्खाल निर्माण, नाली व्यवस्थापन, सबबेस र बेस राख्ने काम पूरा गरेपछि कालोपत्रेको तयारी सम्पन्न भएको हो। उहाँका अनुसार तोरीपानीसम्मको करिब चार किलोमिटर दूरीको स्तरोन्नति योजनामा पहिलो चरणअन्तर्गत स्ट्रक्चर तयार भइसकेको किरोखोर–नेप्टेचौर भागलाई कालोपत्रे गर्न थालिएको हो।

तीन दशमलब पाँच मिटर चौडाइ रहेको सडकलाई कम्तीमा सात मिटरसम्म वृद्धि गरिएको छ। बेनी नगरपालिका–९ र १० तथा रघुगङ्गा गाउँपालिकाका ५, ६ र ८ वडालाई सदरमुकामसँग जोड्ने यो सडकलाई म्याग्दीको प्राथमिकता प्राप्त परियोजनाका रूपमा घोषित गरिएको छ।

वि.स. २०८१ जेठमा पूर्वाधार विकास कार्यालय र मङ्गलादेवी–सुवास कन्स्ट्रक्सनबीच १० करोड १६ लाख एक हजार तीनसय ६४ रुपियाँमा ठेक्का सम्झौता भएको थियो। चालु आर्थिक वर्षभित्र सम्पन्न हुनेगरी तोकिएको यस परियोजनामा हालसम्म करिब ७० प्रतिशत भौतिक प्रगति भइसकेको सवइञ्जिनियर चोखालले जानकारी दिनुभयो।