काठमाण्डौ । कात्तिक १९ गते घोषणा गरिएको नेपाली कम्युनिस्ट पार्टीमा चार नयाँ घटक थपिएका छन्। बिहीबार राजधानीको प्रदर्शनीमार्गस्थित राष्ट्रिय सभागृहमा आयोजित कार्यक्रममा विभिन्न दलका एकीकरण पक्षधर समूहहरूले औपचारिक रूपमा पार्टीमा प्रवेश गरेका हुन्।
समाहित हुनेमा जनता समाजवादी पार्टी (जसपा)को संघीय परिषद् अध्यक्ष राजेन्द्र श्रेष्ठ नेतृत्वको एकीकरण पक्षधर, जनजागरण पार्टी नेपाल, नेकपा बहुमतको विद्रोही समूह र नेकपा (माओवादी)को विद्रोही समूह रहेका छन्।
एकता घोषणा कार्यक्रममा संयोजक पुष्पकमल दाहाल ‘प्रचण्ड’, सह–संयोजक माधवकुमार नेपाल, नेताहरू झलनाथ खनाल, वामदेव गौतम, नारायकाजी श्रेष्ठ, गंगालाल तुलाधरलगायत शीर्षस्थ नेतृत्व उपस्थित थियो। समाहित हुन आएका दलका नेताहरू पनि कार्यक्रममा सहभागिता जनाएका थिए। कार्यक्रममा कार्यकर्ताहरूको समेत बाक्लो उपस्थिति देखिएको थियो।
अघिल्लो महिनाको १९ गते विभिन्न १० घटक एकतामा आएपछि नेपाली कम्युनिस्ट पार्टी घोषणा गरिएको थियो। त्यसपछि भीम रावलसहित दुई दल थपिएको थियो। बिहीबारको एकतासँगै नेकपामा प्रवेश गर्ने घटकको संख्या १६ पुगेको छ।
