काठमाण्डौ । अमेरिकी राष्ट्रपति कार्यालय ह्वाइट हाउस नजिकै बुधबार अपराह्न दुई नेसनल गार्ड सदस्यमाथि गोली प्रहार हुँदा सुरक्षा सतर्कता उच्चस्तरमा पुगेको छ। राष्ट्रपति निवासबाट दुई ब्लक दूरीमै रहेकाे मेट्राे स्टेशन नजिक तैनाथ सैनिकमाथि गरिएको आक्रमणमा दुवै गार्ड गम्भीर घाइते भएका छन्। उनीहरूको अहिले अस्पतालमा उपचार भइरहेको अमेरिकी सञ्चारमाध्यमहरूले जनाएका छन्।

आक्रमणकारीलाई घटनास्थलमै नियन्त्रणमा लिइएको प्रहरीले जनाएको छ। गोली आवाजपछि त्यहाँ पुगेका अन्य नेसनल गार्ड सदस्यले पाल्टिएकाे गोली प्रहारमा आक्रमणकारीलाई समेत चार चोटि लागेको बताइएको छ। वाशिङ्टन डिसी प्रहरीले आक्रमण गर्ने व्यक्ति २९ वर्षीय रहमानउल्ला लाकानवाल रहेको पुष्टि गरेको छ। एपीका अनुसार उनी अफगानिस्तानी नागरिक हुन्।

लाकानवाल ‘अपररेशन अलाइज वेलकम’ कार्यक्रममार्फत सन् २०२१ मा अमेरिका प्रवेश गरेका थिए। अफगानिस्तानबाट अमेरिकी सेनाको फिर्तीसँगै सुरु भएको उक्त कार्यक्रमअन्तर्गत ७६ हजारभन्दा बढी अफगान नागरिकलाई पुनःस्थापना गरिएको थियो। लाकानवालले अफगान सेनामा करिब १० वर्ष सेवा गरेका थिए र केही समय कन्धारस्थित सैन्य अड्डामा पनि तैनाथ रहेको बताइन्छ। उनी विवाहित र पाँच छोराका पिता रहेको नजिकका आफन्तले बताएका छन्।

घटनापछि राष्ट्रपति डोनाल्ड ट्रम्पले आक्रमणकारी बाइडेन प्रशासनको “अपराधी भित्र्याउने उडान” मार्फत अमेरिका आएको आरोप लगाएका छन्। ट्रम्प र उनका समर्थकहरूले कार्यक्रमको सुरक्षा छनोट प्रक्रिया कमजोर भएको दाबी गर्दै आलोचना दोहोर्याउँदै आएका छन्। तर समर्थकहरू भने तालिबानको प्रतिशोधको जोखिममा रहेका व्यक्तिहरूका लागि कार्यक्रम जीवनरक्षक भएको तर्क गर्छन्।

घटनापछि ह्वाइट हाउस क्षेत्र केही समयका लागि लकडाउन गरिएको थियो। आक्रमणमा प्रयोग भएको हतियार र उद्देश्यबारे विस्तृत जानकारी खुल्न बाँकी छ। हाल वाशिङ्टन डीसीमा करिब २२ सय नेसनल गार्ड तैनाथ छन्, जसलाई प्रहरीसरह कानुन कार्यान्वयन वा पक्राउ अधिकार नदिइएको छ।

वाशिङ्टनको अपराध दरसम्बन्धी पछिल्लो तथ्यांकअनुसार मे २५ देखि नोभेम्बर २५ सम्म ६२ हत्या दर्ता भएका छन्, गत वर्ष यही अवधिमा १०७ थियो। त्यसैगरी अगस्ट १२ देखि अहिलेसम्म करिब ६,५०० आपराधिक घटना दर्ता भएका छन्, जुन गत वर्षको ९,५०० भन्दा कम हो।