काठमाण्डौ । नेपाली कांग्रेसका केन्द्रीय उपसभापति धनराज गुरुङले ट्रेड युनियनलाई प्रजातान्त्रिक व्यवस्थाको आधारस्तम्भका रूपमा व्याख्या गरेका छन्। विराटनगरमा आयोजित नेपाल वित्तीय संस्था कर्मचारी संघ कृषि विकास बैंकको आठौं केन्द्रीय परिषद्मा सम्बोधन गर्दै उनले श्रमिक संगठनले देशको राजनीतिक परिवर्तनमा महत्वपूर्ण योगदान दिएको उल्लेख गरे।
उनले २०४६ सालको आन्दोलन कर्मचारीहरूको पेन डाउनको प्रभावकारी भूमिकाले सफल भएको स्मरण गर्दै हाल देखिएका कर्मचारीसम्बन्धी समस्या समाधान गर्न सरकार अग्रसर हुनुपर्नेमा जोड दिए। गुरुङका अनुसार, कृषि विकास बैंकले किसानलाई सहज सेवा र सहकार्य विस्तार गर्न अपरिहार्य रहेको छ।
कार्यक्रमको अध्यक्षता संघका अध्यक्ष राम रावलले गरेका थिए। कार्यक्रममा कोशी प्रदेशका पूर्व मुख्यमन्त्री केदार कार्की, कांग्रेस मोरङ अध्यक्ष डिकबहादुर लिम्बु, नेता गुरुराज घिमिरेलगायतका वक्ताहरूले आफ्नो धारणा राखे।
