काठमाण्डौ — मेडिकल व्यवसायी दुर्गा प्रसाईं सोमबार मध्यराति भक्तपुरस्थित मध्यपुर थिमी नगरपालिका–६ को आफ्नै घरबाट प्रहरीले नियन्त्रणमा लिए । काठमाडौं उपत्यका अपराध अनुसन्धान कार्यालयको ठूलो टोली राति १२ बजेतिर घर पुगे पनि प्रसाईंका साथीसँग प्रारम्भिक प्रतिरोध हुँदा केही समय गेट खोल्न बिलम्ब भएको थियो । अन्ततः प्रहरी बलपूर्वक प्रवेश गरी उनलाई पक्राउ गरियो ।
उनको गिरफ्तारीपछि सरकारले ‘बोलेकै आधारमा अनावश्यक रूपमा’ गिरफ्तारी गरेको आरोप लगाउँदै विभिन्न पक्षबाट आलोचना भएक छन् । जेनजीका अगुवा सुदन गुरुङ र संविधानविद् भीमार्जुन आचार्यसहित धेरैले कारबाहीको औचित्यबारे प्रश्न उठाएका छन् । गुरुङले सामाजिक सञ्जालमार्फत ‘सरकारलाई खुलेआम चुनौती दिने र हिंसात्मक अभिव्यक्ति फैलाउने अन्य व्यक्तिलाई सरकारले बेवास्ता गरेको’ भन्दै गृहमन्त्रालयलाई आलोचना गरे ।
संविधानविद् आचार्यले मध्यरातिको गिरफ्तारीलाई ‘नागरिक शासनमा ठूलो दाग’ भन्दै कानुनी प्रक्रिया उल्लङ्घन भएको टिप्पणी गरे । उनका अनुसार ‘अभिव्यक्ति स्वतन्त्रताको सीमा’ रहे पनि घरमै बसेको व्यक्तिलाई रातारात पक्राउ गर्नु उचित व्यवहार होइन ।
प्रसाईंको गिरफ्तारीप्रति अन्य राजावादी धारका व्यक्तिहरूले पनि असन्तुष्टि जनाए । यसअघि तत्सम्बन्धी कथित भड्काउने अभिव्यक्तिका आधारमा डा. निकोलस भुसाल पनि नियन्त्रणमा परेका थिए । प्रहरीले भने यस्ता घटनालाई ‘अभिव्यक्ति स्वतन्त्रता होइन, कानुनविरुद्धको हिंसात्मक उत्तेजना’ का रूपमा व्याख्या गरेको छ ।
जिल्ला प्रहरी परिसर काठमाडौंले विज्ञप्ति जारी गर्दै प्रसाईँलाई आफ्नै अभिव्यक्तिबाट सार्वजनिक शान्तिमा गम्भीर असर पुगेको आरोपमा पक्राउ गरिएको स्पष्ट गरेको छ । परिसरका प्रवक्ता एसपी पवनकुमार भट्टराईका अनुसार ‘कानुन विपरीत, हिंसा उक्साउने र सार्वजनिक सुरक्षामा खतरा ल्याउने अभिव्यक्ति कसैलाई पनि छुट छैन’ ।
प्रसाईंविरुद्ध सार्वजनिक शान्तिविरोधी कसुरमा जिल्ला प्रशासन कार्यालयबाट चार दिनको म्याद लिएर अनुसन्धान अघि बढाइएको छ । उनले हालै राजनैतिक व्यक्तित्वदेखि सुरक्षा निकायसम्बन्धी संवेदनशील अभिव्यक्ति—दूतावासहरूमा बालेन शाहले बम पड्काउने योजना रहेको र प्रहरीलाई कुटाइ नभएकोजस्ता दाबी—सार्वजनिक रूपमा गरेका थिए ।
