बिहार विधानसभाका २४३ वटा निर्वाचन क्षेत्रमा जारी मतगणनामा सत्तारुढ राष्ट्रिय लोकतान्त्रिक गठबन्धन (एनडीए) ले बहुमतको सीमा पार गरेको छ। बिहीबार बिहान ८ बजेदेखि सुरु भएको मतगणनामा अधिकांश क्षेत्रमा ढिलाइ नभई प्रारम्भिक नतिजा सार्वजनिक भएसँगै एनडीएले १६२ भन्दा बढी सिटमा अग्रता लिएको भारतीय सञ्चारमाध्यम हिन्दुस्तान टाइम्सले उल्लेख गरेको छ। बहुमतका लागि १२२ सिट आवश्यक पर्नेमा जनता दल (युनाइटेड) र भारतीय जनता पार्टी (भाजपा) का उम्मेदवारहरूले क्रमशः ७६ र ६९ सिटमा अगाडि रहेका छन्।
यो नतिजासँगै जनता दल (युनाइटेड) का अध्यक्ष तथा वर्तमान मुख्यमन्त्री नितीश कुमार दशौं पटक बिहारको मुख्यमन्त्री बन्ने निश्चित भएको छ। एनडीएका नेताहरूले विजयको उत्सव सुरु गर्दै कुमारको नेतृत्वमा सरकार गठन हुने दाबी गरेका छन्। यसैबीच, विपक्षी महागठबन्धनले प्रारम्भिक चरणमै ठूलो झट्का खाएको छ। राष्ट्रिय जनता दल (आरजेडी), कंग्रेस, भारतीय कम्युनिस्ट पार्टी, कम्युनिस्ट पार्टी अफ इन्डिया (मार्क्सवादी), कम्युनिस्ट पार्टी अफ इन्डिया (माले) र विकासशील इन्सान पार्टी सम्मिलित यो गठबन्धनले ६८ सिटमा मात्र अग्रता लिएको छ, जसमध्ये ५० सिट आरजेडी र १२ सिट कंग्रेसका उम्मेदवारका छन्।
महागठबन्धनले लालुप्रसाद यादवका कान्छा छोरा तथा ३५ वर्षीय तेजस्वी यादवलाई मुख्यमन्त्री उम्मेदवार बनाएर चुनाव लडे पनि अपेक्षित नतिजा आउन सकेन। पहिलोपटक चुनाव लडेको प्रशान्त किशोरको जनसुराज पार्टीले २ सिट र अन्य साना दलहरूले १२ सिटमा अग्रता लिएका छन्। दुई चरणमा सम्पन्न मतदानपछि विभिन्न एक्जिट पोलहरूले पनि एनडीएको बहुमतलाई नै प्रक्षेपण गरेका थिए। बिहारमा ६७.१३ प्रतिशत मतदाता सहभागिता रहेको थियो, जुन १९५१ यताकै उच्च हो।
