जनता समाजवादी पार्टी (जसपा) नेपालका मधेश प्रदेश सांसद सरोजकुमार सिंह कुशवाहा अख्तियार दुरुपयोग अनुसन्धान आयोगको टोलीद्वारा पुनः पक्राउ परेका छन् । सांसद विकास कोषको रकम दुरुपयोग गरेको आरोपमा उनलाई पक्राउ गरिएको हो ।
अख्तियारका अनुसार कुशवाहाले सांसद विकास कोषमार्फत प्राप्त रकममध्ये करिब ३७ प्रतिशत रकम कमिसनको नाममा आफ्नै खातामा सारेको प्रमाण फेला परेको छ । पूर्वगृहराज्यमन्त्री समेत रहेका उनी यसअघि पनि सोही मुद्दामा पक्राउ परेपछि तारेखमा रिहा भएका थिए ।
अख्तियार स्रोतका अनुसार यसपटक उनलाई विशेष अदालतमा मुद्दा दर्ता गर्नका लागि पुनः पक्राउ गरिएको हो ।
महोत्तरी क्षेत्र नम्बर–४ (ख) बाट प्रदेशसभामा निर्वाचित कुशवाहाको घरमा अख्तियारले गत १२ जेठमा छापा मारेको थियो । सो क्रममा उनका स्वकीय सचिव विनोदकुमार लाल कायस्थ पनि पक्राउ परेका थिए ।
छापामारीका क्रममा अनुसन्धान टोलीले विभिन्न योजना सम्बन्धी कागजात, मोबाइल फोन लगायतका सामग्री बरामद गरी डिजिटल फरेन्सिक परीक्षणका लागि पठाएको थियो । उनी यसअघि २० जेठमा काठमाडौंको अनामनगरबाट पक्राउ परेका थिए ।
