काठमाडौं, साउन २८ — प्रधानमन्त्री केपी शर्मा ओलीले संघीय संसदको प्रतिनिधिसभा बैठकमा हालै सम्पन्न तुर्कमेनिस्तान भ्रमणलाई उपलब्धिमूलक भएको भन्दै विस्तृत विवरण पेश गरेका छन्। उनले उक्त भ्रमणका क्रममा विभिन्न राष्ट्रका उच्चस्तरीय व्यक्तित्वसँग भेटघाट भएको, नेपालले भूपरिवेष्टित विकासशील राष्ट्रको हितमा प्रभावकारी आवाज उठाएको र अन्तर्राष्ट्रिय मञ्चमा नेतृत्व क्षमताको सन्देश प्रवाह भएको बताए।

ओलीले सम्मेलनका दौरान पूर्वाधार निर्माण, सीमापार सम्पर्क विस्तार, जलवायु वित्तमा पहुँच, विज्ञान–प्रविधि प्रयोग र क्षेत्रीय व्यापार–परिवहन सहयोगजस्ता विषयमा नेपालको धारणा राखिएको जानकारी दिए। साथै, उनले सम्मेलन बहानामा तुर्कमेनिस्तान, किर्गिजस्तानका शीर्ष नेतृत्व, संयुक्त राष्ट्रसंघ महासचिवलगायतसँग द्विपक्षीय भेटवार्ता भएको उल्लेख गरे।

संसदमा समसामयिक विषयमा बोल्दै ओलीले विपक्षी दलमाथि संसदलाई "कन्टेन्ट उत्पादनको थलो" बनाउने आरोप लगाए। सहकारी ठगी प्रकरणमा अदालतको प्रक्रिया चलिरहेका व्यक्तिहरूमाथि ‘राजनीतिक प्रतिशोध’को नारा भजाएर भ्रम फैलाउन खोजिएको उनको दाबी थियो। उनले मुलुकमा स्थिरता कायम गर्ने उद्देश्यले सरकार गठन भएको र आगामी २०८४ सालको चुनावसम्म वर्तमान राजनीतिक समीकरण यथावत रहने स्पष्ट गरे।

ओलीले सरकारका विभिन्न उपलब्धिहरू पनि प्रस्तुत गरे— सडक, पुल, सुरुङमार्ग, ऊर्जा निर्यात, औद्योगिक परियोजना, खेलकुद संरचना, शिक्षा र स्वास्थ्य क्षेत्रमा भएको प्रगति र आर्थिक सूचकमा आएको सुधारको विस्तृत विवरण सुनाए। उनले अघिल्लो सरकारको तुलनामा विधेयक दर्ता र पारित दर उच्च भएको, राजस्व संकलन, विप्रेषण आप्रवाह, वस्तु निर्यात र विदेशी मुद्रा सञ्चिति अभूतपूर्व स्तरमा पुगेको बताए।

प्रधानमन्त्रीले आफ्नो मन्तव्यको अन्त्यमा लोकतान्त्रिक प्रणालीलाई ‘मास म्यानुपुलेसन’बाट जोगाउन सबैलाई आह्वान गर्दै, वर्तमान सरकार ‘आधा खाली होइन, आधा भरी’ अवस्थासम्म पुर्याउने प्रतिबद्धता दोहोर्याए।