काठमाण्डौ — सशस्त्र प्रहरी बलले राजस्व अपचलनको आशङ्कामा कैलालीको धनगढीबाट भारतीय नम्बर प्लेटको कन्टेनर नियन्त्रणमा लिएको छ। सीमा सुरक्षा गुल्म त्रिनगरबाट खटिएको टोलीले युपी–३२ एचएन ७२९ नम्बरको कन्टेनरलाई धनगढी उपमहानगरपालिका–२, मिलन चोक नजिकै नियन्त्रणमा लिएको सशस्त्र प्रहरी उपरीक्षक तथा वैद्यनाथ बाहिनीका सूचना अधिकारी वीरेन्द्रबहादुर ऐरले जानकारी दिए। कन्टेनरलाई आवश्यक अनुसन्धान र कारबाहीका लागि बाँकेको कोहलपुरस्थित राजस्व अनुसन्धान कार्यालयमा पठाइएको छ।

यसैगरी, धनगढी उपमहानगरपालिका–१९, खेदास्थित मोहना नदी पारिको गोठनुमा जस्तो संरचनाबाट सशस्त्र प्रहरीले २५ लाख रुपैयाँभन्दा बढी मूल्यको भन्सार छलेर ल्याइएको कपडा बरामद गरेको छ। कपडा बेवारिसे अवस्थामा फेला परेको प्रहरीले जनाएको छ।