काठमाडौँ — लमजुङको मर्स्याङ्दी गाउँपालिका–८, भुलभुलेस्थित ५० मेगावाट क्षमताको माथिल्लो मर्स्याङ्दी–ए जलविद्युत आयोजनाले तीन अर्ब युनिटभन्दा बढी विद्युत् उत्पादन गरेको छ। शुक्रबार साँझसम्ममा ३ अर्ब किलोवाट–घण्टा (युनिट) विद्युत् राष्ट्रिय प्रसारण प्रणालीमा आपूर्ति गरेको आयोजनाले जनाएको छ।
चीनको बहुराष्ट्रिय कम्पनी सिनो हाइड्रोपावरको ९० र नेपाली सगरमाथा पावर कम्पनीको १० प्रतिशत लगानीमा सन् २०१३ मा निर्माण सुरु भएको आयोजना सन् २०१६ सेप्टेम्बरमा उत्पादनमा आएको थियो। व्यवसायिक उत्पादन भने २०१७ जनवरी १ देखि प्रारम्भ भएको हो।
आयोजनाको उत्पादन प्रविधि विभाग प्रमुख तोङ चियाङ्पोका अनुसार वार्षिक ३ करोड ३५ लाख युनिटको अपेक्षाभन्दा माथि उठ्दै यस वर्ष ३ करोड ७३ लाख युनिट उत्पादन भएको छ। २०२४ मा मात्र ३७ करोड ४० लाख युनिट विद्युत् उत्पादन गर्दै वार्षिक लक्ष्यको १०७ प्रतिशत र राष्ट्रिय ग्रिड आपूर्तिमा ११७.१ प्रतिशत उपलब्धि हासिल भएको आयोजनाले जनाएको छ।
रन–अफ–रिभर प्रकारको आयोजनाबाट उत्पादित विद्युत् काठमाडौँ, पोखरा लगायतका क्षेत्रमा आपूर्ति हुँदै आएको छ, जसले विशेषगरी सुख्खा मौसममा विद्युत् अभाव कम गर्न महत्त्वपूर्ण भूमिका खेलेको छ।
करिब १६ अर्ब रूपैयाँ लागतमा बनेको आयोजनाले २० किलोमिटर लामो १२५ केभी प्रसारण लाइन आफैं निर्माण गरेको थियो। साथै, स्थानीय विकासमा सहयोगस्वरूप ३४० मिटर लामो सुरुङ मार्ग, मर्स्याङ्दी नदीमा बेलिब्रिज, सडक निर्माणजस्ता पूर्वाधार विकासमा योगदान दिएको छ। गाउँपालिका अध्यक्ष अर्जुन गुरुङका अनुसार सुरुङ मार्गले स्थानीय आवतजावत र पर्यटन प्रवर्द्धनमा पनि टेवा पु¥याएको छ।
