
काठमाडौँ — सुनसरीको भोक्राहा नरसिंह गाउँपालिका–३ र ६ को बीचमा रहेको बलुवा चौकमा सोमबार बिहान बस र माइक्रोबस ठोक्किँदा चारजनाको मृत्यु भएको छ र २८ भन्दा बढी घाइते भएका छन्।
पूर्व–पश्चिम लोकमार्ग अन्तर्गत इनरुवा–लौकही सडक खण्डमा काकडभिट्टाबाट दिक्तेलतर्फ जाँदै गरेको मे १ ख १७९९ नम्बरको बस र राजबिराजबाट विराटनगरतर्फ जाँदै गरेको प्र २९० १९००१ ज ००४७ नम्बरको माइक्रोबस आपसमा ठोक्किँदा दुर्घटना भएको हो।
जिल्ला प्रहरी कार्यालय सुनसरीका प्रहरी नायव उपरीक्षक योगराज खतिवडाका अनुसार मृतकमध्ये कोशी गाउँपालिका–६ का लक्ष्मण सदा र सप्तरीको महादेवा गाउँपालिका–का शंकर मण्डलको पहिचान भएको छ। अन्य एक पुरुष र एक महिलाको नाम खुलेको छैन। मृतक तीन पुरुषको शव ग्लोबल कार्डियो न्यूरो अस्पतालमा र एक महिलाको शव जिल्ला अस्पतालमा राखिएको छ।
ग्लोबल कार्डियोमा १२ जनाको उपचार भइरहेको छ, जसमा ३ जना सघन उपचार कक्ष (आइसियु)मा छन्। इनरुवा अस्पतालमा ल्याइएका ६ जनामध्ये ३ जनालाई गोल्डेन अस्पताल पठाइएको छ। गोल्डेन अस्पतालमा १० जनाको उपचार भइरहेको छ।
घाइतेहरूमध्ये मोरङ, खोटाङ, सप्तरी, उदयपुर, झापा, इलाम लगायतका विभिन्न जिल्लाका यात्रु रहेका छन्। प्रहरीका अनुसार सामान्य घाइते तीनजना उपचारपछि घर फर्किसकेका छन्।