काठमाडौँ — भैरहवास्थित कारागारमा गत चैत २२ देखि थुनामा रहेका राष्ट्रिय स्वतन्त्र पार्टीका सभापति रवि लामिछानेलाई राखिएको कोठा निरीक्षण गर्न सोमबार राष्ट्रिय मानव अधिकार आयोगको टोली पुगेको छ। रास्वपाका नेताहरूले लामिछानेलाई अमानवीय तरिकाले राखिएको दाबी गर्दै आएका बेला आयोगकी आयुक्त लिली थापा, लुम्बिनी कार्यालय प्रमुख हरि ज्ञवाली र इन्सेक प्रतिनिधि रिमा बिसीसहितको टोलीले ब्लक नम्बर–४ मा पुगेर निरीक्षण गरेको हो।
टोलीका सदस्यहरूका अनुसार लामिछानेसँग भएको कुराकानीमा उनले अड्डासारको अनुमति अदालतबाट प्राप्त भए पनि कारागार प्रशासनले बेवास्ता गरेको गुनासो गरे। खानपानमा भने उनी सन्तुष्ट रहेको इन्सेककी रिमा बिसीले जानकारी दिइन्।
आयुक्त थापाले कोठामा रेडियो र दुईवटा पंखा भए पनि पत्रपत्रिकाको सुविधा नभएको, शौचालयको अवस्था नाजुक रहेको र एसी नरहेको स्पष्ट पारिन्। सुरक्षाको कारण देखाउँदै झ्याल थुनेको र लामिछानेलाई करिब सय दिनसम्म बाहिर हिँडडुल गर्न नदिएको विषय उठाउँदै उनले यसलाई न्यूनतम मानव अधिकारको हननको रूपमा व्याख्या गरिन्।
