काठमाण्डौ— दुई समूहबीचको हिंसात्मक झडपका कारण शनिबारदेखि तनावग्रस्त बनेको कैलाली कारागारमा ४० घण्टापछि नेपाल प्रहरी र सशस्त्र प्रहरीले हतियारसहित प्रवेश गरेका छन्। मानव अधिकार आयोग धनगढी कार्यालयको रोहवरमा आइतबार अपराह्न सुरक्षाकर्मीहरूले कारागारको ब्लक ए र ब्लक बीमा प्रवेश गरी भित्रको अवस्थाबारे खोजतलास सुरु गरेका हुन्।
शनिबारको घटनामा एक कैदीको मृत्यु र ४९ जना घाइते भएको कारागार प्रशासनले जनाएको छ। झडपपछि कैदीबन्दीहरूले भित्रबाट ताला लगाई थुनुवा कक्ष आफ्नो नियन्त्रणमा लिएका कारण सुरक्षाकर्मीलाई प्रवेश गर्न दिइएको थिएन।
पुनः गणनाका क्रममा ब्लक ए मा ३९६, ब्लक बी मा १९८ र महिला ब्लकमा ५६ जना गरी कुल ७०० कैदीबन्दी रहेका पुष्टि भएको छ। शनिबारको हिंसापछि कैदीको संख्यामा अन्योल देखिए पनि आइतबारको गणनामा अघिल्लो तथ्याङ्कसँग मिलान भएको कारागार प्रशासनले जनाएको छ।
स्थिति अझै पूर्ण रूपमा नियन्त्रणमा आउन नसकेकाले सुरक्षाकर्मीले खोजतलास र निगरानीलाई तीव्र पारेका छन्।
