काठमाण्डौ । बिहीबारदेखिको लगातार वर्षाका कारण म्याग्दीको बेनी–जोमसोम सडक खण्डका विभिन्न स्थानमा पहिरो खस्दा आवागमन अवरुद्ध भएको छ। हिमालपारिको जिल्ला मुस्ताङलाई राष्ट्रिय राजमार्गसँग जोड्ने एक मात्र मार्ग अवरोध हुँदा मुक्तिनाथ र दामोदरकुण्ड जाने यात्रीहरू समस्यामा परेका छन्।

रघुगङ्गा गाउँपालिका–३ बैसरीमा सडक माथिबाट खसेको पहिरोले करिब ५० मिटर सडक पूर्णरूपमा बन्द भएको छ। त्यस्तै, अन्नपूर्ण गाउँपालिका–३ सुकेबगरमा पनि पहिरो खसेर बाटो अवरुद्ध भएको जिल्ला प्रहरी कार्यालय म्याग्दीका सूचना अधिकारी सागर पौडेलले जानकारी दिए।

बेनी–जोमसोम कोरला सडक आयोजनाका इन्द्रसिंह शेरचनका अनुसार सडक खुलाउने प्रयास भइरहे पनि लगातारको वर्षाका कारण काममा कठिनाइ भएको छ। पर्यटन व्यवसायी समेत रहेका शेरचनले यात्रुहरूलाई वर्षाको समयमा यात्रा अघि सडकको अवस्था अनिवार्य रूपमा बुझ्न सुझाव दिएका छन्।

यसैबीच, बेनी–दरवाङ सडक खण्डको बेनी नगरपालिका–४ धुमाउने भीर र मालिका गाउँपालिका–६ बाङ्गे पहिरो क्षेत्रमा अति जोखिम रहेको प्रहरीले चेतावनी दिएको छ।