काठमाण्डौ । नेपाल–भारत सीमाको भारतीय क्षेत्र रूपैडिहा, वार्ड नम्बर १० रामजानकीस्थित खाली घरको बगैँचामा बिहीबार मृत अवस्थामा फेला परेका नेपाली युवकको पहिचान भएको छ। मृतक बाँके कोहलपुर–९ पिपरी झण्डहवा निवासी अरण वर्नवाल रहेको भारतीय प्रहरीले जनाएको छ।

रुपैडिहा प्रहरी चौकीका सब–इन्स्पेक्टर राहुल सरोजका अनुसार युवकको बायाँ हातमा “अरुण” लेखिएको ट्याटुका आधारमा बहिनी प्रभा वर्नवालले शव पहिचान गरेकी हुन्। सरोजका भनाइअनुसार मृतकको अनुहारमा गहिरो चोटको निशान देखिएको छ र उनको मृत्यु दुई–तीन दिनअघि नै भएको अनुमान गरिएको छ।

भारतीय प्रहरीको प्रारम्भिक अनुमान अनुसार युवक सीमापारि लागुऔषध सेवनका लागि गएका हुनसक्छन्। पहिचान भएपछि कानुनी प्रक्रिया पूरा गरी शव आफन्तलाई बुझाइने जनाइएको छ।

रक्षाबन्धनको पूर्वसन्ध्यामा अरणको मृत्युको खबरले वर्नवाल परिवारलाई गहिरो शोकमा डुबाएको छ। गत वर्ष पनि रक्षाबन्धनकै समयमा एक नेपाली युवकको शव यही क्षेत्रमा फेला परेको थियो।