काठमाण्डौ । कर्णाली डेभलपमेन्ट बैंक लिमिटेडमा भएको तीन अर्ब २० करोडको बैंकिङ्ग घोटाला प्रकरणमा १०३ जना प्रतिवादी फरार रहेको उच्च अदालत तुलसीपुर, नेपालगन्ज इजलाशले जानकारी दिएको छ।
नेपालगन्जमा प्रधान कार्यालय रहेको उक्त बैंकको अनियमिततासम्बन्धी मुद्दा नेपाल प्रहरीको केन्द्रीय अनुसन्धान ब्युरो (CIB) को अनुसन्धानपश्चात साउन १४ गते जिल्ला सरकारी वकिल कार्यालय बाँकेमार्फत उच्च अदालतमा दर्ता गरिएको थियो। १०९ जनालाई प्रतिवादी बनाइएको मुद्दामा हालसम्म ४ जना मात्र पक्राउ, दुई जनाको मृत्यु भइसकेको र बाँकी १०३ जना फरार छन्।
पक्राउ परेका व्यक्तिहरूमा तत्कालीन प्रमुख कार्यकारी अधिकृत राजेन्द्रवीर राय, पूर्व अध्यक्ष पशुपतिदयाल मिश्रा, र वित्तशाखा प्रमुख बेदप्रकाशसिंह ठकुरी रहेका छन्। ती तीनै जनालाई अदालतले पूर्पक्षका लागि थुनामा पठाएको हो। नेपाल राष्ट्र बैंकका पूर्व कर्मचारी भुवन बस्नेत भने दुई लाख धरौटीमा रिहा भएका छन्।
न्यायाधीश चन्द्रबहादुर सारु र पुनमसिंह चन्द को संयुक्त इजलाशबाट जारी गरिएको ४५ पृष्ठ लामो आदेश अनुसार बाँकी १०३ जनालाई पक्राउ गर्न ३५ दिने म्यादसहितको पूर्जी जारी गर्ने प्रक्रिया अघि बढाइएको छ। फरार सूचीमा रहेका व्यक्तिहरूको खोजीका लागि प्रहरीलाई निर्देशन दिइएको छ।
फरार सूचीमा बैंकका उच्च कर्मचारी, सञ्चालक, लेखापरीक्षक, राजनीतिक दलका नेता, चिकित्सक र स्थानीय जनप्रतिनिधिसम्म परेका छन्। उल्लेखनीय नामहरूमा पूर्व अध्यक्ष डा. ओमप्रकाश मिश्र, पूर्व CEO दिनेशकुमार रावत, निरजविक्रम शाह, विष्णुप्रसाद कक्षपति, शाखा प्रमुख दीपा थापा, डुडुवा गाउँपालिका–६ का वडाध्यक्ष मोहनराम मिश्र, वरिष्ठ चिकित्सक डा. उषा राणा शाह, नेता ओमप्रकाश आजाद, ओमप्रताप राणा, लेखापरीक्षक विनमकुमार श्रेष्ठ, भुवनप्रसाद गैरे, तुलाराम कुर्मी, केशवप्रसाद न्यौपाने र शुरेशचन्द्र श्रेष्ठ छन्।
फरार सूचीमा रहेका १०५ जनामध्ये राप्ती पोलिमर्स प्रालिका सञ्चालक महेशजङ्ग थापा (मृत्यु: वैशाख ३१, २०७८) र बैंक कर्मचारी धनन्जय कश्यप (मृत्यु: वैशाख ५, २०८२) को मृत्यु भइसकेको छ।
उक्त मुद्दा राष्ट्र बैंकबाट गठन गरिएको व्यवस्थापन समूहका तर्फबाट अख्तियार प्राप्त उपनिर्देशक जुगलकिशोर कुशवाह को जाहेरीका आधारमा दर्ता गरिएको हो।
