काठमाडौं — पछिल्लो आर्थिक वर्षमा वैदेशिक रोजगारीको क्रममा मृत्यु भएका १,४०१ जना नेपालीको शव नेपाल ल्याएर परिवारको जिम्मा लगाइएको छ । नेपाल प्रहरीको तथ्यांकअनुसार ती शवहरू मृतकको देश फर्काउने प्रक्रियामार्फत परिवारलाई बुझाइएको हो ।
सबैभन्दा धेरै मृत्यु २६ देखि ३० वर्ष उमेर समूहका युवाहरूको भएको छ । यस समूहका २३३ जना नेपालीको शव फर्काइएको छ, जुन देशको सबैभन्दा उत्पादनशील उमेर समूह हो ।
अन्य उमेर समूह अनुसार मृतक संख्याः
- २० वर्षभन्दा कम उमेरका – २९ जना
- २१–२५ वर्ष – १७२ जना
- ३१–३५ वर्ष – २२६ जना
- ३६–४० वर्ष – २२५ जना
- ४१–४५ वर्ष – २१५ जना
- ४६–५० वर्ष – ११७ जना
- ५१–५५ वर्ष – ७१ जना
- ५६–६० वर्ष – २४ जना
- ६१–६५ वर्ष – १२ जना
- ६६–७० वर्ष – १२ जना
- ७० वर्षभन्दा माथि – ६५ जना
यी तथ्यांकले देखाउँछ कि मुलुकको सबभन्दा ऊर्जावान जनशक्तिले विदेशमा रोजगारीको क्रममा ज्यान गुमाइरहेका छन् ।
यस अवधिमा वैदेशिक रोजगार विभागले मात्र ४८१ शव नेपाल झिकाएको थियो भने १,०८६ शवलाई मृतकका घरसम्म पुर्याइएको थियो ।
सरकारले एक वर्षमा मृत्यु भएका १,५१७ कामदारका परिवारलाई करिब १ अर्ब २ करोड ३४ लाख रुपैयाँ आर्थिक सहायता प्रदान गरेको जनाएको छ । हाल, वैदेशिक रोजगारमा ज्यान गुमाउने व्यक्तिका परिवारलाई सरकारले १० लाख रुपैयाँको राहत दिने व्यवस्था छ ।
विदेशमा रोजगारी खोज्दा नेपाली युवाको ज्यान गुमाउनु पर्ने अवस्था अझै गम्भीर सामाजिक र नीतिगत प्रश्नका रूपमा खडा भएको देखिन्छ ।
