काठमाडौँ । ग्लोबल स्टडी एक्स्पो – मल्टिडेस्टिनेशन संस्करण ऐतिहासिक रुपमा सफल भएको छ। नेपालमा पहिलोपटक आयोजित यस शैक्षिक मेला विद्यार्थी, अभिभावक, शैक्षिक प्रदायक र शुभेच्छुकहरूको सक्रिय सहभागिताका कारण सम्भव भएको हो।
कार्यक्रममा अष्ट्रेलिया, बेलायत, अमेरिका, दुबई र थाइल्याण्डबाट आएका २५ भन्दा बढी प्रतिष्ठित शैक्षिक संस्थाहरूले आफ्नो अनुभव र जानकारी प्रस्तुत गरेका थिए। साथै, ३०० भन्दा बढी उत्साही विद्यार्थीहरूले आफ्नो शैक्षिक भविष्यबारे जानकारी लिन अवसर प्राप्त गरेका थिए।
शैक्षिक प्रदायक संस्थाहरूका प्रतिनिधिहरू विश्वका विभिन्न देशहरूबाट नेपाल आएका थिए। उनीहरूको सहभागिताले कार्यक्रमको स्तर उचाइमा पुर्याउनुका साथै विद्यार्थीहरूलाई सटीक मार्गदर्शन प्रदान गर्न सहयोग पुग्यो।
विद्यार्थी र अभिभावकहरूको चासो, विश्वास र सहभागिताले सम्पूर्ण कार्यक्रमलाई अर्थपूर्ण बनाएको आयोजकहरू बताउँछन्। उनीहरूको सक्रियता नै कार्यक्रमको मुख्य प्रेरणादायी पक्ष रहेको जनाइएको छ।
साथै, कार्यक्रमको सफलतामा निरन्तर साथ दिने शुभेच्छुक, सहयोगी संस्था र समर्थकहरूको योगदान पनि उल्लेखनीय रह्यो। उनीहरूको समर्थनले कार्यक्रमलाई एक सार्थक र प्रेरणादायी मोडमा पुर्याएको हो।
यो एक्स्पोलाई शैक्षिक अवसरहरूमा पहुँच वृद्धि गर्ने एउटा थालनीको रूपमा हेरिएको छ। आयोजक संस्थाका अनुसार भविष्यमा अझ व्यापक स्वरूपमा यस्ता कार्यक्रम आयोजना गरिनेछन्।
