काठमाडौँ । प्रधानमन्त्री केपी शर्मा ओलीले कीर्तिपुरस्थित क्रिकेट रङ्गशालाको निर्माण कार्य अन्तिम चरणमा पुगेको बताएका छन्। सामाजिक सञ्जालमार्फत् सार्वजनिक गरेको सन्देशमा प्रधानमन्त्री ओलीले तोकिएको समयमै काम नसकाएको भन्दै निर्माण कम्पनीले हर्जना तिर्दै काम अघि बढाइरहेको जनाएका छन्।
उनका अनुसार तीन सिफ्टमा काम गरिए पनि वर्षा र अन्य प्राविधिक कारणले ढिलाइ भएको हुन सक्नेछ। यद्यपि, सरकार अब निर्माण कार्यमा नतिजामूलक प्रगति देखाउन दृढ रहेको ओलीको भनाइ छ।
“सरकारले दण्ड र पुरस्कारको व्यवस्था गरेर कामको गति बढाउने प्रयास थालेको छ,” प्रधानमन्त्रीले लेखेका छन्, “सरकारी निर्माणका अरू काममा पनि यस्तो प्रणाली लागू गर्दैछौँ।”
प्रधानमन्त्री ओलीको भनाइ अनुसार निर्माण प्रक्रियामा अब लापरबाही गर्नेलाई सजाय र जिम्मेवारी पूरा गर्नेहरूलाई प्रोत्साहन दिने नीतिमा सरकार अघि बढिरहेको छ।
